«جۇلدىز» — ءبىزدىڭ ەلدىڭ ەڭ باستى اۋرۋى!

«جۇلدىز»
ءبىزدىڭ ەلدىڭ ەڭ باستى اۋرۋى!
بۇگىن بىزدە 18 ميلليون حالىقتا «جۇلدىز» دەپ سانالاتىن كەمى ميلليون ادام بار…
ءوسىپ كەلە جاتقان كەز كەلگەن بالامەن سويلەسسەڭ وسى جۇلدىز قاتارىندا بولعىسى كەلەدى… مەيلى تالانتى بولسا دا، بولماسا دا…
ال، اتا-انامەن سويلەسە قالساڭ ولار دا بالالارىنان بولاشاق جۇلدىز جاساعاسى كەلەدى…
مەن، اۋەيى ەل بولىپ كەتپەدىك پە؟ — دەپ ويلايمىن ۇنەمى…
ارينە، ءار اتا-انا بالاسىنىڭ ەل الدىندا سىيلى بولىپ جۇرگەنىن قالايدى، بىراق، سىيلى بولۋدىڭ جولى تەك اۋەي بولۋ عانا ەمەس قوي…
ءوز سالاڭنىڭ بىلىكتى، ۇزدىگى بولا الساڭ كەز كەلگەن سالادا بەدەلدى بولا الاتىنىڭدى ۇيرەتۋ بالا تاربيەسىندە قانشالىقتى قيىن بولماق؟ كەز كەلگەن جەردە بالاسىن شۋ مەن شوۋعا سۇيرەپ جۇرگەن قاۋىمدى كورگەندە كەيدە قارنىڭ اشادى… كەيدە جىنىڭ ۇستايدى…
ءيا، بۇعان شىنى كەرەك اتا-انا كىنالى ەمەس اۋ، بۇگىندە ءتورتىنشى بيلىك اتانعان اقپارات دەگەن الپاۋىت كىنالى…
كەزىندە احاڭ: «حالىقتىڭ كوزى، ءسوزى ءھام ءوزى» — دەپ اتاعان اقپارات قۇرالدارىنىڭ جازاتىنى، ايتاتىنى، كورسەتەتىنى سولار. بالاپان ۇيادا نەنى كورسە، ۇشقاندا سونى ىلەدى…
مەكتەپتە ساباق بەرىپ جۇرگەندە كورەسىڭ، قانشاما بولاشاقتا جاقسى مامان، عىلىمنىڭ تىزگىنىن ۇستاي الاتىن قابىلەتتى بالالار شوۋ مەن شۋ قۋىپ ءجۇرىپ قور بولادى… نە ساباق جوق، نە ونەر جوق، جەل ءسوزدى جەڭىل تىرلىك قۋعا بوس بەلبەۋ بوپ شىعا كەلەدى ءاپ ساتتە…
بۇكىل اقپاراتتىڭ دارىپتەيتىنى ءدال سول داڭعازا سالا… ال دارىپتەپ الادى دا، وزدەرى اقپاراتتىق ساراپتاما جاساپ جاتادى، ساراپتامالارىندا بۇگىنگى بالالار ينجنەر، مەحانيك نەمەسە مۇعالىم بولعىسى، عىلىم قۋعىسى كەلمەيدى، — دەپ ماماندىق تاڭداۋ تۋرالى مايىن تامىزىپ جىرلاپ جاتادى… سوعان جارتىلاي بولسا دا وزدەرى كىنالى ەكەنىن سول قاۋىم سەزە مە ەكەن، تۇگە؟
قاي ءوز سالاسىنىڭ مامانى مەحانيك، ينجەنەر، عالىم نەمەسە بىلىكتى ۇستازدى دارىپتەپ ەفير ءتورىن بەرىپ جاتىرسىڭدار؟ ەفيردىڭ ءتورى كۇندىزگى، تۇنگى ستۋديالارىڭنىڭ ءبارى جۇلدىز قۇرتتار بولسا، ەرتەڭ كىمگە وكپەلەيمىز؟ جەرىمىزدەگى بايلىق پەن سانامىزداعى بيلىككە يە بولا الماي جاتساق كىمدى كىنالايمىز؟
ءۇش مەملەكەت قاتىسا سالىپ حالىقارالىق دەپ اتالاتىن شۋ مەن شولاردىڭ جەڭىمپازىن جارىسا جازىپ، جۇلدىزداردىڭ سىبىرىمەن كۇنىن كورىپ وتىرعان جۋرنالدارعا جابىلا باسقاننان نە ۇتامىز؟
الەمدىك عىلىم باسەكەلەرىندە اتوي سالىپ جۇرگەن قازاقتىڭ دارىندى بالالارىن وزگە ەلدىڭ ۋنيۆەرسيتەتتەرى گرانتىن قۇشاقتاتىپ، وزدەرىنە اكەتىپ جاتقانىن دا كوبىمىز بىلمەيمىز اۋ، شىركىن…
ءدال الەمدىك عىلىم باسەكەسىندە تالايدى اۋىزعا قاراتقان دارىنداردى سانا دەسە مەن جۇزدەپ ساناپ بەرەر ەم، بىراق، قادىرىن ءبىلىپ قاستەرلەمەسەك پايدا نە؟
باسقاسىن ايتپاعاندا الەمدىك حيميا وليمپيداسىنىڭ ەكى مارتە التىنىن ولجالاعان تارازدىڭ تۇلەگى، Massachusetts Institute of Technology ۋنيۆەرسيتەتىنىڭ تۇلەگى Kairat Ashimءدى دە كىم تانيدى؟ ەشقايسىمىز… بۇنداي دارىندار ەلىمىزدە، شۇكىر، جەتەرلىك… بىراق، ولار جۇلدىز ەمەس، نەگىزى، ناعىز دارىپتەلەتىن جۇلدىزدار سولار ەدى…
مىنە، ءبىزدىڭ عىلىمعا دەگەن وي، بولاشاققا دەگەن كوزقاراسىمىز…
ا، ايتپاقشى، بىزدە ءوزىمىزدىڭ جۇلدىز دەپ اتالاتىن ميلليون ادام از سەكىلدى بۇگىندە شەتەلدەن جۇزدەپ شاقىرامىز… بيىل ەكسپو-دا بۇل اۋرۋ تىپتەن اسقىناتىن سەكىلدى… (سولاردى شاقىرعان ەلدەن كەتكەن ەسىل اقشانى بۇكىل مەكتەپكە زەرتحانا جاساپ بەرسە عوي دەپ ارماندايسىڭ…)
ءبىز بۇرىن كوبىندە توي جاساي قالساق كورشى رەسەي جۇلدىزىنسىز وتپەيتىن ەدى… قازىر بىزدە بۇل دەرت قالىڭدادى، جۋمونگ اتانعان كارىستى، F4 دەپ اتالاتىن قيىلعان جىگىتتەرىن دە، ءتىپتى ءۇندىنىڭ كەلىنى ءانانديدى دە الپەشتەپ شاقىرىپ، ءتوردى بەرگىزىپ، تالاي بالاعا قولتاڭبا الىپ بەردىك… اناندي بولام دەپ جۇرگەن اڭقاۋ بالا دا از ەمەس بۇل كۇنى…
بيىلعى ەكسپو بىزگە، بىزدىكىنە دە ەمەس، جۇزدەگەن مەگا جۇلدىزعا ازىق بولاتىن سەكىلدى…
باسى دجەكي چانمەن باستالىپ جاتىر ەكەن، باياندى بولسىن!
بولاشاقتا تەك جۇلدىزدار تۇراتىن ەلگە اينالايىق)) نەگىزى كۇلەتىن نارسە ەمەس. ەلدى قورعايتىن، ەلدى كوركەيتەتىن جۇلدىزدار ەمەس…
قازاقستاندى تانىتتى، — دەگەن ساسىق اتاقتان اۋلاق بولايىقشى، بىرەۋ تانىعاننان ايىمىز وڭىنان تۋسا وسى كەزدە بىزدە اسقان ەل بولماس ەدى… تانىلۋ ءۇشىن شاشقانىمىز بەن شاشىلعانىمىز از ەمەس-ءتى.
P.S. قالىڭ «جۇلدىزدىڭ» اراسىندا جۇرەمىز دەپ، «كۇنىمىز» بەن «ايىمىزدان» ايىرىلماساق دەگەن وي عوي… ايتپەسە، جۇرتتىڭ بالاسىنىڭ جۇلدىزدىعىندا نەم بار… تەك تورىڭە كەپ تويىپ ءىشىپ، ارتىنان اڭگىمە ايتىپ كەتەر ارامتاماق «جۇلدىز قۇرتتاردى» شاقىراتىندارعا قارنىم اشادى دا… نەم بار، ايتپەسە…
سويلەپ ۇيرەنگەن اۋىز جىبىرلاعانىن قويمايدى… ايتپايىن دەسەڭ تە ايتاسىڭ… (مۇعالىمبىز عوي، اقىل ايتقاندى جاقسى كورەمىز)))

5066 رەت جالپى وقىلدى 6 رەت بۇگىن وقىلدى
Rating: 5.0/5. From 1 vote.
Please wait...

دوباۆيت كوممەنتاري

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *