ورتالىق اشۋ وڭاي ما؟

ءيا، بۇگىن ءبىلىم بەرۋ ورتالىقتارى جاڭبىردان كەيىنگى جاۋقازىنداي قاپتاپ كەتتى، ءتىپتى، ءبىلىم سالاسىنا دىم قاتىسى جوق ادامدار دا ءبىلىم بەرۋ ورتالعىن اشىپ جاتىر. بىراق، ءبارى بىردەي بالا ساناسىنا ساپالى ءبىلىم بەرىپ، قالتاسىن قامپايتىپ جاتقانى جوق، اشىلعان ورتالىق قانشالىق كوپ بولسا، جابىلعانى دا سونشالىق كوپ…

كەيبىر ادامدار ورتالىقتاردىڭ كوبەيىپ كەتۋىنە الاڭداسا، كەيبىر ادامدار قۋانۋدا، سىراحانالار مەن تۇنگى كلۋبتاردىڭ سانىنا الاڭداماعان تالاي قاۋىم، ءبىلىم بەرۋ ورتالىقتاردىڭ كوبەيۋىن تەجەۋ كەرەك دەيدى… نارىق زاڭدىلىعىن ەشكىمنىڭ توسا المايتىنىن ەسكەرسەك، ءدال سول سەكىلدى، ەشكىم دە جەكە مەنشىك وقۋ ورتالىقتارىنىڭ سانىنا شەكتەۋ قويا الماسى انىق. ءبىلىم سالاسىندا ون جىل، وقۋ ورتالىعىن باسقارۋدا بەس جىل ستاجى بار ازامات رەتىندە ورتالىق اشۋ، جۇرگىزۋ تۋرالى كەڭىنەن ساراپتاما جاساۋدى ءجون كوردىم.

 القيسسا

 قوسىمشا ءبىلىم بەرۋدىڭ ءمان-ماعاناسىنىڭ ارتۋى ونىڭ بالالار مەن جاسوسپىرىمدەردىڭ بوس ۋاقىتى جاعدايىندا ەرىكتىلىك نەگىزدە شىعارماشىلىق جانە تانىمدىق موتيۆاتسياسىن دامىتۋ، دەربەس تالاپتارىن قاناعاتتاندىرۋ، ءوز ەركىنە ساي ماقساتىمەن اينالىسۋىنا، اسىرەسە، بولاشاق ماماندىق باعىتىن تاڭداۋىنا جاردەمدەسۋ، ءسويتىپ ومىرگە بەيىمدەۋ، سالاۋاتتى ءومىر سالتىنا تارتۋ، سايىپ كەلگەندە بوس ۋاقىتتى مازمۇندى وتكىزۋدى ۇيىمداستىرۋ، عىلىم، بىلىمگە باۋلۋ.

ءبىلىم بەرۋ ورتالىعى بىزدە ەمەس، الەمنىڭ بارلىق ەلىندە جەتەرلىك، ءتىپتى، بىزدەن نەشە ەسە كوپ. ال قازاقستاننىڭ ءبىلىم كەڭىستىگىندە ءبىلىم بەرۋ ورتالىقتارىنىڭ پايدا بولعانى دا بۇگىن ەمەس، الدە نەشە ون جىل. باسقاسىن بىلاي قويعاندا تەك ءتىل ۇيرەتۋ باعىتىن ۇستانعان حالىقارالىق ورتالىقتاردىڭ بىزدەگى فيليالدارىنىڭ ءوزى رەسمي ساناق بويىنشا 400-دەن اسادى. بۇدان تىس جەكەلەگەن باعىتتاعى ورتالىقتار ودان دا كوپ. ال ولاردىڭ ماقساتىنىڭ ءبارى ءتىل ۇيرەتۋ مە، باسقا ما، ونى باسقا ماقالانىڭ جۇگىنە قالدىردىق. ءبىز تازا ءبىلىم بەرۋ ورتالىقتارى تۋرالى از كەم ساراپتاۋ جاسالىق…

ورتا ءبىلىمدى قوسىمشا بەرەتىن ورتالىقتاردىڭ قازىرگى كۇندە سانى بىزدە بۇكىل رەسپۋبليكا بويىنشا مىڭعا جۋىقتايدى. بۇل از با، كوپ پە، ماسەلە مۇندا ەمەس، ماسەلە ساپاسىندا. ساپاسى تۋرالى سول ورتالىقتان بالا وقىتقان اتا-انالار مەن سول ورتالىقتا ءبىلىم العان وقۋشىلار ايتقان دۇرىس بولار. نارىقتاعى باسەكەلەستەردىڭ ساپاسى تۋرالى ءبىزدىڭ ايتۋىمىز ابەستىك.

قازاقستانداعى ورتا ءبىلىمدى قوسىمشا بەرەتىن ورتالىقتاردىڭ ەڭ ۇلكەنىنىڭ قازاقستاننىڭ ءار ءوڭىرىن قوسا ەسەپتەگەندە 20 فيليالى، 15 جىلدان استام تاريحى بار (جارناما بولىپ كەتپەسىن اتتارىن اتامادىم). بۇگىندە تەك وسى قوسىمشا ءبىلىم بەرۋ ورتالىعىندا جالپى قازاقستان بويىنشا ءبىلىم الاتىن وقۋشى سانى ون مىڭنان اسادى. ەڭ كىشى ورتالىقتاردىڭ سانىندا شەك جوق، ءتىپتى بەس-التى بالانى ءبىر-ەكى اي وقىتىپ، ارى قاراي جابىلاتىن، ءبىر بولمەلى وقۋ ورتالىقتارىنىڭ ءوزىنىڭ سانىندا شەك جوق.

 وقۋ ورتالىقتارىنىڭ باستى باعىتتارى

جەكە وقۋ ورتالىقتارى ءارتۇرلى باعىتتا جۇمىس جاسايدى. تەك ءبىر باعىتتا جۇمىس جاسايتىن دا، 50-دەن استام باعىتتا دا جۇمىس جاسايتىن ورتالىقتار جەتەرلىك. جۇرت سۇرانىسى مەن زامان تالابىنا بايلانىستى قالىپتاسقان وقۋ ورتالىقتارىنىڭ باستى باعىتى مىنالار:

  1. پرودلەنكا

  2. مەكتەپكە دايىندىق

  3. پاندىك وليمپيادالارعا دايىندىق

  4. كۇندەلىكتى ساباققا دايىندىق

  5. ءتىل ۇيرەتۋ ورتالىقتارى

  6. دارىندى بالالارعا ارنالعان زياتكەرلىك مەكتەپتەرگە دايىندىق (نزم، بيل، ت.ب.)

  7. ۇلتتىق بىرىڭعاي تەستكە دايىندىق.

  8. نازارباەۆ ۋنيۆەرسيتەتىنە جانە الىس-جاقىن شەتەل ۋنيۆەرسيتەتتەرىنە دايىندىق.

ءبىلىم بەرۋ ورتالىقتارىنىڭ سۇرانىسى مول 8 باعىتى وسىلاي. مۇنىمەن قوسا قوسىمشا ءارتۇرلى باعىتتا جۇمىس جاسايتىن ورتالىقتار بار.

وسىدان بەس جىل بۇرىن وقۋشىلار نەگە ورتالىق جاعالاپ ءجۇر دەگەن تاقىرىپتا ءبىراز ساراپتاما جاساپ ەدىم، جالپى ورتالىقتاردىڭ دۇرىس باعىتتا دامۋى مەن جەتىلۋى ەل ءۇشىن اۋاداي قاجەت. بىراق، مۇلدە كەرەك ەمەس باعىتتا (تەك ءۇي تاپسىرماسىن ورىنداپ بەرۋ، ت.ب) جۇمىس جاساپ جۇرگەن ورتالىقتار جەتەرلىك. ءيا، بۇل ورتالىقتار نارىق زاڭدىلىعى بويىنشا كوپ وتپەي ىعىسارى انىق.

ورتالىق جۇرگىزۋ وڭاي ما؟

بىزدە بيزنەستىڭ ەڭ ۇلكەن اۋرۋى ءبىر ادام ءبىر بيزنەس ءتۇرىن باستاپ تابىسقا جەتسە، جۇرت سول باعىتتا بيزنەس باستاۋعا ارەكەت ەتەدى. بىراق ادام قاي سالادا بيزنەس جاساسا، سول سالانىڭ جىلىگىن شاعىپ مايىن ىشكەن بولۋ كەرەك، ايتپەسە بيزنەس تابىس اكەلمەيدى.

ءدال سول سەكىلدى ءبىلىم بەرۋ ورتالىعىن اشۋ ءۇشىن دە، كەمىندە مەكتەپتە ەكى-ءۇش جىل عۇمىرىن ارناعان، ءبىلىم سالاسىنىڭ قىرى مەن سىرىن بىلەتىن ادام بولۋ كەرەك. بۇل سالادا نە نارسەگە سۇرانىس بار، نە نارسە جۇرتقا اسا قاجەتتى، سونى تۇسىنگەندە عانا ءىس ىلگەرى باسادى. سەبەبى، مىنا نارىق زامانىندا وفيس جالداپ، جارناما جاساپ الىپ سول اقشاڭىز دالاعا كەتۋى ابدەن مۇمكىن. بۇگىندە قانداي بيزنەس بولسا دا، ەڭ الدىمەن، سول سالانى زەرتتە، سودان كەيىن بەل شەشىپ سۋعا سەكىر. بۇل دەگەنىڭ بۇل سالانىڭ سىرىنا قانىق بولساڭىز، تاۋەكەل ەت دەگەنىم.

بۇگىندە قاي سالادا بولسىن ساپالى كادر تابۋ ەڭ كۇردەلى ماسەلە. ال، ءبىلىم بەرۋ ورتالىعىن جۇرگىزۋدەگى ەڭ ماڭىزدى ءھام كۇردەلىسى – وسى ساپالى كادر ماسەلەسى. ەگەر ورتالىقتا بەلگىلى ءبىر بولىك مۇعالىم ساپاسىز بولسا، وندا ورتالىق عۇمىرى ۇزاققا بارمايدى. سەبەپ، جۇرت ساپاسىز دۇنيەگە اقشا شاشپايتىنى، اقى تولەگەن سوڭ ەڭ ءبىرىنشى ساپا تالاپ ەتەتىنى تابيعي زاڭدىلىق.

ءبىلىم سالاسى كۇردەلى سالا، ونىڭ قىرى مەن سىرى، بۇگىندە جاڭا تەحنولوگيالاردىڭ دامۋى مەن ونلاين ءبىلىم بەرۋ ءۇردىسىنىڭ قالىپتاسۋى بۇل سالاعا جاڭا كوزقاراسپەن، جاڭا ىزدەنىسپەن كەلمەگەن جاعدايدا قاتارداعى اشىلىپ جابىلاتىن ورتالىقتاردىڭ كوپ بولاتىندىعى انىق. ءبىلىم بەرۋ ورتالىقتارى ءبىر قاراعاندا ءبىلىم سالاسى بولعانمەن، ول وزىعى توزىعىن، ىلگەرىسى كەيىنىن شايناپ جۇتا سالاتىن بيزنەستىك باعىت، بۇل باعىتتى ساقتايتىن تەك ساپا، ساپانى ۇستاي الماساڭ سان سوعىپ قالۋىڭ ابدەن مۇمكىن.

ورتالىقتاردىڭ كوبەيۋىنىڭ ەلگە پايداسى ءھام زيانى

ورتالىق كوبەيۋىنىڭ ەڭ ۇلكەن پايداسى – ءبىلىم سالاسىنداعى باسەكەلەستىكتى قالىپتاستىرادى. الەمدەگى تانىمال جوعارى وقۋ ورىندارى مەن حالىقارالىق مەكتەپتەردىڭ ءبىرازى العاشقى باستاماسىن قوسىمشا ءبىلىم بەرۋ ۇيىمدارىنان باستاعان، ءبىزدىڭ دە ورتالىقتاردىڭ بولاشاقتا جەكە مەكتەپ، ۋنيۆەرسيتەت رەتىندە داميدى دەپ سەنەمىن. سونىمەن بىرگە جالپى بۇل مەملەكەتتەن اقشا ءبولىنىپ، مەملەكەت اسىراپ وتىرماعاندىقتان، ساپانى ۇستاۋ وتە ماڭىزدى، ەگەر ساپانى ۇستاي الماساڭ، وندا بيزنەس رەتىندە ءوزىن اقتامايدى، وندا جابۋىڭا تۋرا كەلەدى. بۇل ورتالىقتاردىڭ كوبەيۋى بەلگىلى ءبىر دەڭگەيدە ءبىلىم دەڭگەيىن، ءبىلىم ساپاسىن ارتتىرۋدا تاپتىرماس ءمانى بار ەكەنى انىق.

نەگە ءبىلىم سالاسى دا ءوز الدىنا دامىماسقا، وندا بۇگىنگى ورتالىقتار سول باعىتتى بەرۋ كەرەك. راس، قوسىمشا ءبىلىم بەرەتىن ورتالىقتار وتە كوپ، مەن وسى باعىتتا 4 جىل بۇرىن «وقۋشىلار نەگە ورتالىق جاعالاپ ءجۇر؟» دەگەن ماقالا جازىپ، ءبىراز ساراپتاما جاساعانىمدى جوعارىدا اتاپ ءوتتىم. جالپى، كەز كەلگەن نارسەنىڭ پايداسى مەن زيانى بولاتىنى سەكىلدى، بۇنىڭ دا پايدالى جانە زياندى جاعى بار. پايدالى جاعى ءيا، ءار بالا ءۇشىن ءوزىنىڭ ىزدەنىس باعىتىندا قوسىمشا ءبىلىم الۋ ساپالى مامان بولۋ ءۇشىن دە كەرەك. ال زياندى جاعى، مەملەكەتتىك مەكتەپتەگى قاعازدان قۇتىلعىسى كەلەتىن ساپالى ماماندار جەكە ورتالىقتارعا كەتىپ مەكتەپتەگى ساپالى مامان تاپشىلىعى تىپتەن اۋىرلايدى. بۇگىنگى ارتىق جۇمىسى مەن باس كوتەرتپەس قاعازى بار جۇيە ۇستازدارعا ىزدەنىس پەن شىعارماشىلىق قابىلەت بەرمەيدى، ەركىندىك بەرمەيدى، سول سەبەپتى ورتالىقتاردىڭ كوبەيۋى مەملەكەتتىك مەكتەپتەردەگى مۇعالىم، ونىڭ ىشىندە ساپالى مۇعالىم سانىن تىپتەن ازايتۋى مۇمكىن. بىراق، مۇمكىن بۇل دا پايداسى جاعى بولار، وسىنىڭ اسەرىنەن مەكتەپتەر ويانىپ، باسەكەنىڭ نە ەكەنىن تۇسىنەر دەپ تە ويلايسىڭ.

نەگىزى قوسىمشا ءبىلىم بەرۋ ورتالىقتارى جۇيەلى جۇمىس جاساسا، وقۋشىلار ءۇشىن دە، ەلدىڭ ءبىلىم-عىلىم سالاسى ءۇشىن دە بەرەرى كوپ. سەبەبى، جارتى كۇن مەكتەپتە بارلىق پاننەن ستاندارتتى جالپىعا بىردەي ءبىلىمدى العان بالا بولاشاقتا باراتىن ماماندىقتارىنا قاراي بەيىمدەلىپ قوسىمشا ءبىلىم الۋى كەرەك، مىسالى، سپورتقا، ونەرگە بارعىسى كەلەتىندەر ءۇشىن ارناۋلى كۋرستار بارى سياقتى، عىلىمعا بارعىسى كەلەتىندەرگە، ساپالى جوعارى وقۋ ورنىنا تۇسكىسى كەلەتىندەرگە قوسىمشا ءبىلىم بەرۋ ورتالىقتارى تاپتىرماس مۇمكىندىك. بۇنى قازىر اتا-انالار دا ءتۇسىندى. بالاسىنىڭ بىلىمىنە ينۆەستيتسيا سالۋ – اتا-انانىڭ ۇرپاعى الدىنداعى ەڭ ۇلكەن جاۋاپكەرشىلىگى جانە ەڭ ءتيىمدى، قايتىمدى ينۆەستيتسيا بولارى انىق.

بىراق، ورتالىقتىڭ ءبارى وزىق پا؟

«ورتالىق وقۋشىلاردىڭ ءبىلىمىن شىن مانىندە كوتەرىپ جاتىر ما؟» دەگەن «سۇراقتىڭ جاۋابىن سول ورتالىقتاردىڭ يەسى كىم، جۇيەسىن كىم جاسايدى» دەگەن سۇراقتىڭ جاۋابى نەگىزىندە قاراعان دۇرىس شىعار. سەبەبى مەن قانشاما ورتالىقتى زەرتتەدىم، كوبىنىڭ نەگىزگى شارۋاسى وقۋشىلاردىڭ ءۇي تاپسىرماسىن ورىنداپ بەرۋمەن شۇعىلدانادى، بۇنىڭ بالاعا پايداسىنان زيانى كوپ، بۇلاردىڭ ءىسى – تازا اقشا ءۇشىن عانا. ال كەيبىر ورتالىقتار بەلگىلى ءبىر يدەولوگيانى جۇرگىزۋ ماقساتىندا اشىلعان، وزدەرىنىڭ جەكە ماقساتى، مۇددەسى ءۇشىن جۇمىس جاساپ ءجۇر، بۇل ەلدىڭ ەرتەڭىنە ۇلكەن قاۋىپ تە تۋدىرۋى مۇمكىن.

ءيا، ەلدە ساپالى ءبىلىم بەرىپ، قانشاما وقۋشىنىڭ دارىنىن شىڭداپ، قانات قاقتىرىپ جۇرگەن ورتالىقتار جەتەرلىك. مەكتەپتە ءار بالانىڭ دەگەيىنە قاراي ساباق ءوتۋ مۇمكىندىگى بولمايدى، ستاندارتتان كەيىن شەگىنۋ نەمەسە وتە قاتتى وزۋعا مۇمكىندىك بولا بەرمەيدى، جالپىلاي ايتقاندا سىزىلعان سىزىقپەن ءجۇرۋ كەرەك. ال ورتالىقتىڭ ارتىقشىلىعى بالانىڭ دەڭگەيىنە قاراي بولىنۋىندە، بالا سانىنىڭ ازدىعى مەن ساباقتىڭ سوعان ساي جۇيەلىلىگىندە، ەركىندىگىندە. ءتىپتى، مەكتەپ مۇعالىمدەرىنىڭ قولىندا جوق وقۋلىقتار مەن ادىستەمەلىكتەردىڭ بار بولۋىندا. مۇندا ءبارىن باسىنان باستاپ وقىتادى: ماسەلەن، قازاق تىلىندە بۋىن، ەكپىننەن، قازاقستان تاريحىندا تاس داۋىرىنەن، ماتەماتيكادا قوسۋ، كوبەيتۋدەن باستالادى. سونداي-اق، مەكتەپ وقۋلىقتارىندا ايتىلمايتىن، بىراق، جوو-دا سۇرالاتىن مالىمەتتەر دە قامتىلادى. اۋىلدىق، اۋداندىق جەردىڭ وقۋشىلارى مۇنداي كۋرستاردى قالاعا بارىپ وقيتىندىقتان، باسەكەلى ورتانى سەزىنىپ، ءبىرجولا ىزدەنىسكە ارناي الادى.

سوندىقتان دا، ورتالىقتىڭ يەسى كىم، جۇيەسىن كىم جاسايدى، ول ورتالىقتا ساباق بەرەتىندەر كىمدەر دەگەن سۇراققا تولىق جاۋاپ بەرگەن سوڭ عانا، ول ورتاداعى ءبىلىم ساپاسى تۋرالى، ول ورتالىقتان وقىپ شىققان وقۋشىنىڭ ءبىلىمى مەن تاربيەسى تۋرالى ايتۋعا بولادى. باسكەلەستىكتىڭ زاڭى بويىنشا وزىقتىڭ دا، توزىقتىڭ دا اتىن اتامادىق، وزىعىن تاڭداۋدى وقىرماننىڭ ءوز ەنشىسىنە قالدىردىق.

وزگەدەن وزىمە قاراي… 

جالپى قوسىمشا ءبىلىم بەرۋ ورتالىعىنا ەڭ العاش 2012 جىلى ءبىر ورتالىقتىڭ ۇسىنىسىمەن ساباق وتۋگە بارعان ەم، سودان كەيىن ءۇش ورتالىقتىڭ مۇعالىمى، اكىمشىلەرىنىڭ قاتارىندا بولىپ ەڭ سوڭعى تاجىريبەمدى اتالمىش ءوز ورتالىعىما شوعىرلاندىردىم. اتتان اتتىڭ نەسى ارتىق، ادىمداپ باسار ءجۇرىسى،  – دەمەي مە، مەنىڭ ەكى جىلدان ءسال اساتىن ۋاقىتتا قارىزبەن باستالعان ورتالىقتىڭ استانانىڭ بەلدى ورتالىعى عانا ەمەس، رەسپۋبليكاعا تانىمال قازىرگى دەڭگەيدەگى بيىككە كوتەرۋىمە جالعىز سىر، ول – كاسىبيلىك. ول ءبىلىم سالاسىنداعى جانە بيزنەستەگى كاسىبيلىك دەپ ويلايمىن. ءبىز تەك ءبىلىم بەرۋمەن، قوسىمشا ساباق بەرۋمەن عانا ەمەس، بالا جانىمەن جۇمىس ىستەپ كەلەمىز، ول بىلىممەن قاتار ورىلگەن تاربيە بەرۋ باعىتى دەپ ويلايمىن. ول رەسپۋبليكالىق دەڭگەيدە بەرىلىپ جۇرگەن ترەنينگتەر، وتكىزىلىپ جاتقان ءىس شارالاردىڭ ناتيجەسى.

ءوزىمىزدى ماقتاعىم كەلمەيدى، جاڭادان بەرى بىرازعا كەتىپ تە قالدىم، ورتالىق اشىلعاننان باستاپ كۇنى بۇگىنگە دەيىن ۇستازدارىمىز جەكە ۇستاز رەتىندە دە رەسپۋبليكالىق جارىستاردا بيىك ورىنداردان كورىنىپ كەلەدى. ال، شاكىرتتەر الدەنەشە وليمپيادادان القا تاعىپ ۇلگەردى. قىرىقتان استام قوسىمشا وقۋ قۇرالدارىن دايىندادىق، ءۇش جىل وقۋشى تۇلەتىپ، 90 پايىزدان جوعارى گرانت يەگەرى اتانىپ، اتا-انانىڭ العىسىنا بولەندىك. بۇگىندە رەسپۋبليكانىڭ تۇكپىر-تۇكپىرىنەن ءبىلىم الۋشىلار كەلىپ، ايلاپ وقىپ، ءبىلىم الۋدا. شەتەلدەن كەلگەن 200-دەن استام قانداستى قازاق مەكتەپتەرىنە دايىندادىق، ءبىرازى بۇگىندە جوعارى وقۋ ورىندارىندا ستۋدەنت اتانىپ ۇلگەردى…

بىراق بۇنىڭ ءوزى ءبىز ءۇشىن ءالى از جۇمىس، ءبىز قازاقستاننىڭ قوسىمشا ءبىلىم بەرۋ سالاسىندا تىڭنان سۇرەن سالعىمىز كەلەدى، سول ءۇشىن كەيبىر جاسالىپ جاتقان تىرلىك تۋرالى ءبىر ساۋساعىم بۇگۋلى قالسىن.

ارينە، وزگە قالاعا قانات جايۋ ويىمىزدا بار، بىراق ساندى ارتتىرىپ ساپانى ءتۇسىرىپ الۋدان قورقامىن، بالا جانىن تۇسىنەتىن، ءبىلىم سالاسىنىڭ قىر-سىرىن مەڭگەرگەن، وسى سالاعا نيەتتى سەرىكتەستەر تابىلىپ جاتسا، بىلگەنىمىزبەن ءبولىسىپ، باسقا قالاعا وتاۋ تىگۋگە بولادى. بۇل دا ۋاقىتتىڭ ەنشىسىندە.

ارينە، ورتالىق اشۋ جانە دامىتۋ باعىتىندا بيزنەس كەڭەسشى رەتىندە دە ءوزىمدى جاڭا باعىتتا سىناپ كوردىم، الدا دا جەكە ءوز الدىنا ءبىلىم بەرۋ ورتالىقتارىن، جەكە مەكتەپتەر اشاتىندارعا بيزنەس كەڭەسشى بولۋعا دايىنبىز.

ورتالىق اشۋعا نيەتتى قاۋىمعا سوڭعى ءسوز…

ءبىلىم بەرۋ ورتالىقتارىنىڭ ءبىراز قىرى مەن سىرىنا ۇڭىلدىك، ەندىگىسىن ءار ءبىلىم بەرۋ ورتالىعىنىڭ سايتىنا، الەۋمەتتىك جەلىدەگى پاراقشاسىنا ۇڭىلسەڭىز كوكەيدەگى كوپ سۇراقتارىڭىزعا جاۋاپ تاباسىز…

«ساعىنباي شىقپا ساپارعا» دەگەندەي، بۇل سالاعا زەرتتەمەي، سالا رەتىندە مەڭگەرمەي ۇرىنۋعا بولمايتىنىن ەسكەرتەمىن. ال بۇل سالاعا قىزىعۋشىلىعى اسا كۇشتى جاندارعا بولاشاقتا تىڭ جوبالارمەن كەلەرمىز دەگەن ويدامىن.

باستىسى ۇلىمىز ۇلاعاتتى، قىزىمىز يناباتتى بولسىن. قازاق بالاسىنىڭ ءبارى دارىندى، دۇرىس باعىت بەرۋ ءار ۇستازدىڭ قاسيەتتى پارىزى، وسى پارىزىمىزعا ماڭگىلىك ادال بولايىق، ويتكەنى ءبىلىم سالاسى ۇلتتىڭ، ەلدىڭ كەمەل كەلەشەگى.

اياتجان احمەتجان. رەسپۋبليكالىق «KAZBILIM» ورتالىعى ديرەكتورى

6727 رەت جالپى وقىلدى 37 رەت بۇگىن وقىلدى
Rating: 5.0/5. From 2 votes.
Please wait...

دوباۆيت كوممەنتاري

ۆاش e-mail نە بۋدەت وپۋبليكوۆان. وبيازاتەلنىە پوليا پومەچەنى *